Í ár eru 50 ár liðin, síðan Jóan Pauli Joensen fór undir sítt virki sum fólkalívsfrøðingur. Tað byrjaði tann dagin, hann fekk bræv frá Christiani Matras, sum heitti á unga studentin um at koma heim at savna tilfar og granska í føroyskari siðsøgu og føroyskum fólkaleiki. Einki slit hevur verið á tí arbeiðnum síðan.
Í hesari bókini eru tríggjar áhugaverdar ritgerðir frá ymiskum tíðarskeiðum í hesum granskingarlívi. Hvør teirra umboðar ymiskan tíðarbundnan áhuga og ymiskar partar av føroyskari mentan og siðsøgu.
Alt er sagt frá við somu frásøgugleði, sum hevur eyðkent Jóan Paula øll hesi árini, hann hevur sagt okkum so livandi frá føroyskari siðsøgu.